Qırımnıñ Rusiye akimiyeti ne qadar vade etse ve yalvarsa da, yarımadada 2016 mevsimi olmadı. Raatlanğanlar 2015 senesine baqqanda bile az, er bir iş adamı ise bunı maddiy kârına esaslanıp isbatlar. Resmiy Rusiye ve Qırım kütleviy haber vastalarında bunı aytmaylar, faqat internette soñki ay içinde Qırımdaki tatil aqqında bir sıra malümat peyda oldı. Olarnıñ ekseriyeti, yımşaq aytacaq olsaq, quvanmay. İleride vaziyet daa beter olacağına oşay.
Vatanperver ruslar ve işğalge qoltutqanlar bile razı – Qırım 90-larda qalıp, andan çıqmağa istemey. Qırımlılar Rusiyeniñ Qırım efsanesini darma-dağın etken meşur bloger İlya Varlamovnıñ yazılarını faal sürette paylaştılar.
Servis olmağan bir yerde Moskva fiyatları Qırımdan soñki raatlanğanlarnı quvacaq
Qırım kurortları, Türkiye ve Mısırnı aytmasaq bile, Krasnodar ülkesinen bile qıyaslanmaz. İşğalden evel millionlarnen ukrain ve rus ve belorus turistlerini ucuz fiyatlar ve qolay naqliye imkânları celp etken olsa, şimdi bu hususiyetlerden iç bir şey qalmadı. Qırım paalı bir yer, sebepsiz paalı. Servis olmağan bir yerde Moskva fiyatları Qırımdan soñki raatlanğanlarnı quvacaq. Kurort Rusiye uquq qoruyıcılarınen beraber qala bile, olarnıñ başqa çaresi yoq, devlet memurları ve devlet müessiseleriniñ hadimleri yollamalarnı aldılar. Faqat kurort mevsiminde para qazanğan qorantalar bu şekilde kâr alamaz, yalı boyunda yaşağan on biñlernen aileler içün bu yeterli olmaz. Ne olacaq?
İşğalden evel Qırımnıñ kurort ve turizm nazirligi devlet organlarına ve qırımlılarğa plâj raatlığı Qırımnıñ esas hususiyeti olmağanını añlatmağa tırışqan edi. Bir çoq ceetten yarımada Türkiye ve diger cenüp kurortları ile raqip olamaz. Sabıq nazir Aleksandr Liyev şifahane-kurort yönelişi, tarih, kezinti ve diger turizm çeşitleri vastasınen kurort mevsimini kenişletmege tırışqan edi. Bu yolda ğalebeler de oldı. İşğalden soñ Qırım paalılaşmasınen vaziyet daa aydın ola – yıl-yıldan plâj işleri daa beter olacaq.
Qırım 90-lardan çıqmalı
Yarımada yaşamaq içün plâj turizmi onıñ hususiyeti olmağanını tanımalı, yalıdaki şeer ve qasabalarda tertip-nizam qurulmalı ve ciddiy seviyede inkişaf ettirilmeli. Qırım 90-lardan çıqmalı. Amma bu yol o qadar qolay degil. Mesele şu ki, yarımada yolbaşçıları kapitalizm şekillengen zamanlarnıñ şahısları oldı. Federal yardımğa bağlanıp oturğan keçmiş insanlarından bir de bir teşebbüs olurmı? Pek şübelenemiz. Yerli akimiyet topraqnı satmaycaqmı? Daa çoq şübelenesiñ.
Halqara toplulıq Qırımnı körmegende yarımadanı inkişaf ettirmek – aman-aman imkânsız bir şey. Ne servis ananeleri, ne Rusiyede keyfiyetli bir kurort inkişafı tecribesi bar, halqara şirketler tarafından «renksiz alanğa» yatırım yapılması aqqında laf bile ketmey. Yarımada artıq Kremlniñ sevimli oyuncağı bile degil. Moskva ükümdarları Qırımnı körmey. Olar tış siyaset meselelerine batıp, ucuz cermay fiyatlarına alışmalı. Qırımlılarğa berilgen vadeler artıq eşitilmey. Aksine, federal programmalarnı eki qat qısqartmaq teklifleri sıq-sıq seslendirile. Demek ki, yalı şeerleri ve qasabaları daa beter vaziyetke azırlanmalı. Paramız yoq, amma dayanıñız, degen dayın.
İvan Sergeyenko, Qırım közeticisi
«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün