Rusiyege boysunğan Aqmescit akimiyeti Salğır özeniniñ yatağını temizlemege avale etti, dep bildire şeer memuriyetiniñ matbuat hızmeti.
Elde etilgen malümatqa binaen, ot faal şekilde çalına, çöplük toplanıp çıqarıla.
Tünevin Qırım.Aqiqat Aqmescitte Salğır özenine belli olmağan qaverenkli maddeler tökülgenini köstergen videonı paylaştı.
Yaz başında Salğır bataqlıqqa oşay edi. Suv seviyesi alçaq oldı, tübünü ösümlikler qaplap aldı. Yalı kenarı temiz degil, bazı yerlerde bozulğan.
2013 senesi Qırım Ukraina nezareti astında bulunğan vaqıtta bu yerde yalı kenarınıñ yañıdan yapılması çerçivesinde damba qurulacaq edi, bu Şmidta soqağından Kirova soqağına qadar özenniñ qısmında suv seviyesini kötermege yardım eter edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
