Link açıqlığı

Saatnıñ esas haberi

Dünya matbuatı Qırım aqqında: Putin ve Erdoğan öpüşmeleri ve Qırım turizminiñ ölümi


Özüni yahşı etip tanımaq içün başqasınıñ fikrini ögrenmek kerek. Keçken bir qaç kün dünya matbuat vastalarında nasıl aydınlandı, ne kibi serlevalar oldı, angi haberlerge ise diqqat etilmedi – Qırım.Aqiqatnıñ ananeviy qaydları.

«Ukraina bütün topraqlarını, şu cümleden Qırımnı keri alğanına qadar Amerika Qoşma Ştatlarınıñ Rusiyege qarşı cezaları devam etecek», – dep tekrarlay iyün 29-da prezident Barack Obamanıñ Rusiye ve Merkeziy Asiya yardımcısı Celeste Wallanderniñ aytqanlarını Bursada Bugün türk portalı.

«Rusiye: Qırım ve ordu parası yoq» – Poloniyanıñ Rzeczpospolita gazetasında bunıñ kibi bir serleva altında maqale çıqtı. Neşir Rusiye Federatsiyası maliye nazirliginiñ mudafaa parasını 15%-ğa, Qırım masraflarını ise eki qat kesmege teklifi ile maruzasını qayd ete. Gazetanıñ bildirgenine köre, Qırım devlet memurlarınıñ aylıqları 10%-ğa eksilecek. Sebep olaraq cermay fiyatınıñ tüşmesi ve «Rusiye iç buhranı» qayd etile.

Poloniyanıñ Gazeta Wyborcza gazetası iyün 30-da öz mühbiriniñ işğal etilgen Qırım maqalesini derc etti. Maqalede 2014 senesinden berli ğayıp olğan ve qaçırılğan 20 qırımtatarı, em de 18 siyasiy mabus aqqında aytıla. Tintüv, qorquzuv, FSBniñ mektep talebeleri ile keçirgen «subetleri» – işğal etilgen Qırımnıñ bugünki alı. «Ana-vatanımızda yaşap, özümizni serbest is etmek istegenimiz içün qabaatlı oldıq. Avropa Qırımda olğanlarğa lâqayt qalmamalı», – dep qayd ete neşir bir yıldan ziyade apiske alınğan Meclis reisiniñ muavini Ahtem Çiygoznıñ ömür arqadaşı Elmira Ablâlimovanıñ aytqanlarını.

Yeni Haber türk portalı Ukraina prezidenti Petro Poroşenkonıñ Bulğaristan ziyareti aqqında yaza. Bu memleketniñ prezidenti Rosen Plevneliyev şöyle dedi: «Qırım bizim içün – Ukrainadır, Ukraina ise – Avropadır. Bulğaristan Rusiyeniñ Qırım işğalini iç bir vaqıt tanımaz».

«Erdoğan ve Putin öpüşip süsleneler», – International Business Times itibarlı bir iş portalı bu serleva altında «Rusiye-Türkiye munasebetleriniñ eyilişmesi Qırımnıñ turistik saasını yoq ete bile» maqalesini derc ete. İç turizm Moskva ve Ankara munasebetleri bozulğanında fayda körgen edi. Şimdi ise Rusiyeniñ cenüp musafirhaneleri, şu cümleden işğal etilgen Qırım qorqalar. Bodrumdaki dört yıldızlı musafirhaneler Yaltadaki üç yıldızlı ötellerden ucuz olacaq. Turistlerniñ 10-15% Türkiyeni saylap keter. Turistik operatorlar tatilini Aq deñizde keçirecek olğan insanlardan bir sıra haber ala. Olarğa keder ete bilecek tek bir şey bar – terroristik telükeniñ yüksek derecede olması.

«İsrail qorantası Qırımda ğayıp oldı» – dep haber ete iyül 2-de The Times of Israel gazetası. «Qartana, qartbaba ve 6-10 yaşları arasında üç torunı cuma künü saba Qırımda enip, şimdige qadar qoranta azalarınen bağlanmadılar». Aile Moskvadan Aqmescitke keldi, amma ukrain şirketinde sigorta alğan edi.

Rzeczpospolita gazetası iyün başında Aluştada Rusiye politsiyası tarafından narazılıq mitinginiñ dağıtılması ve mayıs soñunda Aqmescitte «kazaklarnıñ» quvulmasını bildire. Neşirniñ qayd etkenine köre, 2014 senesi Rusiyege yarımadanı işğal etmege yardım etkenler bile yaqalana.

«Rusiye Qırımda nükleer silânı yerleştire bile», – dep tekrarlay Ukraina prezidenti Petro Poroşenkonıñ aytqanlarını Zamanında haber türk haber toplayıcısı. O, Rusiyeniñ Ukrainağa qarşı alıp barğan gibrid cenkinde qullanğan on biñlernen asker ve yüzlernen tanknı hatırlata.

XS
SM
MD
LG