Mayıs 30-da, bazarertesi künü Kiyevde Qırım yaşları teşebbüsinen teşkil etilgen «Qırımnıñ kelecegi» halqara yaşlar forumı başlana.
Forumnıñ esas maqsadı bütün dünyadan yaş qırımtatar liderleriniñ Qırımnıñ kelecegi boyunca noqta-i nazarını teşkil etmektir.
Forum idarecisi Gulnara Muratovanıñ bildirgenine köre, teşkilâtçılar tahminen 400 ariza aldı, olardan Ukraina ve tış ülkelerdeki qırımtatar diasporalarından 18-35 yaşındaki tahminen 200 iştirakçi saylandı. Forumğa Türkiye, Poloniya, Romaniya, Litvaniya ve Almaniyadan temsilciler kelecek.
«Qırımnıñ kelecegi» halqara yaşlar forumı «Bratislava» musafirhanesinde (Malışko soqağı, 1) keçirilecek ve mayıs 31-ge qadar devam etecek.
Qırım Rusiye tarafından işğal etilgen soñ qıtaiy Ukrainağa biñlerce insanlar köçip ketti. Mecliste tahminen 35 biñ qırımtatar kişi aqqında aytalar, olar yarımadanı terk etmege mecbur oldılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
