Mayıs 27-de, cuma künü Rusiye tarafından işğal etilgen Qırımda qırımtatar tilinde tasil berilgen Kefe mektebinde talebeler Federal havfsızlığı hızmetiniñ temsilcisi tarafından sorğuğa çekildi.
«Saba toplaştıq, ve o birer talebeni ana-babasınen beraber müdir odasına çağıra edi. O yerde daa mektep ruhiyatçısı bar edi. Nevbetteki sualler berildi: anneksiya, işğal, vatnik degen talebeler bar edimi? Georgiy şeriti aqqında sual bergen ediler – ne vaqıt onı taqtıñız, ne vaqıt ve nasıl şaraitte çıqardıñız? Kimseniñ ricasınenmı, özüñizmi çıqardıñız? Talebelerniñ ana-babaları tek 9-cı sınıfta oquğan qırımtatar oğlanları sorğuğa çekilgeninden çorlandı», – dep añlattı talebelerniñ biriniñ anası Elmira Gaziyeva. Bu aqta Gromadske radio bildire.
Kefe regional meclisiniñ azası Suleyman Kadırov vaqianıñ tafsilâtını ayttı: «Olar qorqqan ediler, ana-babalar çorlandı, çünki tek qırımtatar balalarını topladılar. Buña FSB hadimi ayttı ki, tedbirler daa devam etecek, dep, daa bitmedi».
Kadırovnıñ sözlerine köre, Georgiy şeritlerinen bağlı vaqia 15 sanlı mektepte yüz bergen edi, «amma kiçik edi». Böyle etip, onıñ añlatqanına köre, mayıs 9 künü qayd etilgende mektep müdiri qırımtatar sınıflarına keldi ve balalarda Georgiy şeritleri yoq olğanını kördi. O vaqıt o bu balalardan onar ruble topladı, şeritlerni satın aldı ve «olarğa taqmağa başladı».
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
